Il-Formola V tintuża biex tinbidel l-ortografija jew biex jiżdiedu fonts Maltin u aċċenti Maltin (à è ì ò ù À È Ì Ò Ù) mal-‘isem li bih wieħed irid jissejjaħ’ fuq Att ta’ Twelid.

Biex issir bidla fl-isem, huwa meħtieġ dokument ta' sostenn (Karta tal-Identità Maltija/Passaport Malti/ċertifikat taż-żwieġ) maħruġ qabel l-1 ta' Diċembru 2012, sakemm il-bidla fl-isem ma tkunx ikkunsidrata mid-Direttur tar-Reġistru Pubbliku bħala korrezzjoni minuri għall-isem. Tiġi applikata tariffa ta' €5.

Il-Formola V tista' tiġi sottomessa wkoll f'każijiet fejn persuna tixtieq li isimha jidher bil-karattri dijakritiċi Maltin tal-alfabett Malti. Ma japplikaw l-ebda tariffi.

1. Biex tadotta l-kunjom ta' wieħed mill-ġenituri jew il-kunjom taż-żewġ ġenituri fi kwalunkwe għażla.


2. Jekk it-tifel/tifla diġà għandu/għandha kunjom doppju, il-formola tista' tintuża biex jitneħħa wieħed mill-kunjomijiet.


3. "Kunjom" jinkludi l-kunjom tal-ġenitur mat-twelid jew il-kunjom tal-ġenitur fiż-żmien tat-twelid tat-tarbija.


4. Il-kunjom tal-applikant jinbidel fuq l-atti kollha tal-istat ċivili. (Jekk l-applikant huwa miżżewweġ, il-kunjom tal-konjuġi l-ieħor jibqa' l-istess sakemm dak il-konjuġi ma jimliex il-Formola UU).


5. Fejn it-tifel/tifla għadu/għadha ma laħaqx/laħqitx l-età ta' 18-il sena, il-preżentazzjoni tal-Formola TT għandha ssir miż-żewġ ġenituri, jew minn wieħed mill-ġenituri jekk l-ieħor ikun mejjet, jew, jekk iż-żewġ ġenituri jkunu mejtin, mit-tutur jew kuratur tagħhom.


6. Il-Formola trid timtela u tiġi ffirmata quddiem xhud li jrid ikun uffiċjal tar-Reġistru Pubbliku jew membru tal-professjoni legali.


7. Miżata ta' €5 hija applikabbli fil-każijiet kollha.

Il-Formola UU hija rakkomandata għall-konjuġi jew it-tfal ta' applikant li għamel użu mill-Formola TT:

1. Biex tuża l-kunjom magħżul minn antenat/konjuġi fil-Formola TT.
2. Fejn it-tifel/tifla għadu/għadha ma laħaqx/laħqitx l-età ta' 18-il sena, il-preżentazzjoni tal-Formola UU għandha ssir miż-żewġ ġenituri, jew minn wieħed mill-ġenituri jekk il-ġenitur l-ieħor ikun mejjet, jew, jekk iż-żewġ ġenituri jkunu mejtin, mit-tutur jew kuratur tagħhom.
3. Il-Formola trid timtela u tiġi ffirmata quddiem xhud li jrid ikun uffiċjal tar-Reġistru Pubbliku jew membru tal-professjoni legali.
4. Miżata ta' €5 hija applikabbli fil-każijiet kollha.

Il-Formola XX hija rakkomandata għall-konjuġi jew tfal ta' applikant li uża l-Formola WW:

1. Biex tuża l-kunjom magħżul mill-antenat/konjuġi tagħhom fil-Formola WW.
2. Fejn it-tifel/tifla għadu/għadha ma laħaqx/laħqitx l-età ta' 18-il sena, il-preżentazzjoni tal-Formola XX għandha ssir miż-żewġ ġenituri, jew minn wieħed mill-ġenituri jekk l-ieħor ikun mejjet, jew, jekk iż-żewġ ġenituri jkunu mejtin, mit-tutur jew kuratur tagħhom.
3. Il-Formola trid timtela u tiġi ffirmata quddiem xhud li jrid ikun uffiċjal tar-Reġistru Pubbliku jew membru tal-professjoni legali.
4. Miżata ta' €5 hija applikabbli fil-każijiet kollha.

Il-Formola Y hija rakkomandata għal konjuġi miżżewġin f'Malta qabel id-29 ta' Diċembru 2020.

1. Biex jinbidel il-kunjom wara ż-żwieġ ta' wieħed jew taż-żewġ konjuġi miżżewġin f'Malta qabel id-29 ta' Diċembru 2020. Jekk iż-żewġ konjuġi jagħżlu l-istess kunjom u jkollhom kunjom tal-familja fuq iċ-ċertifikat taż-żwieġ, il-kunjom tal-familja (u l-kunjom tat-tfal preċedenti li kienu assumew il-kunjom tal-familja l-antik) jinbidel awtomatikament biex jirrifletti l-kunjom il-ġdid. Jekk il-konjuġi diġà għandhom tfal irreġistrati bil-kunjom tal-familja l-antik, m'hemmx bżonn li tiġi sottomessa formola ġdida peress li dan isir awtomatikament permezz tal-istess Formola Y. Kwalunkwe tfal preċedenti oħra mwielda mill-istess koppja li fir-rigward tagħhom ma kienx intgħażel kunjom tal-familja, ikunu jistgħu jadottaw il-kunjom il-ġdid permezz tal-Formola TT.
2. Jekk permezz tal-Formola Y, il-konjuġi għażlu kunjomijiet differenti u kien diġà ntgħażel isem tal-familja, il-konjuġi jistgħu b'mod konġunt ibiddlu l-isem tal-familja preċedenti u l-kunjom tat-tfal preċedenti sabiex dawn jassumu l-isem tal-familja l-ġdid. F'każijiet bħal dawn, m'hemmx bżonn li tiġi sottomessa formola ġdida peress li dan isir bl-istess Formola Y. Kwalunkwe tfal preċedenti oħra mwielda mill-istess koppja li fir-rigward tagħhom ma kienx intgħażel isem tal-familja jkunu jistgħu jadottaw il-kunjom il-ġdid permezz tal-Formola TT.
3. Il-Formola trid timtela u tiġi ffirmata quddiem xhud li jrid ikun uffiċjal tar-Reġistru Pubbliku jew membru tal-professjoni legali.
4. Miżata ta' €5 hija applikabbli fil-każijiet kollha.